2025 жылғы 12-13 қарашада Түрікмен ауыл шаруашылығы университетінің базасында Халықаралық бейбітшілік және сенім жылына арналған «Агроинновация: орнықты дамуға жол» атты Халықаралық ғылыми-жобалық жұмыстар байқауы өтті. Іс-шараға әр түрлі елдердің жас зерттеушілері мен студенттік командалары қатысып, аграрлық салаға арналған заманауи шешімдерді ұсынды.

«Ақпараттық жүйелер» білім беру бағдарламасының 1 курс студенттері – Қожахмет Әділет, Рамазанова Аяна, Женбаев Бексұлтан және Мағзұмбеков Арыстан – біздің университетті абыроймен таныстырып, «IT-жобалар» бағытында 1 орын алып, жеңіске жетті.

Команданың жұмысын сарапшылар аграрлық сектор үшін өзектілігі, инновациялық тәсілі және практикалық маңыздылығы үшін жоғары бағалады.

Жобаның жетекшісі ф.-м.ғ.к., «Ақпараттық технологиялар» кафедрасының қауымдастырылған профессоры Рыстыгулова Венера Ботабаевна конкурсқа дайындықтың барлық кезеңдерінде студенттерді ғылыми сүйемелдеу мен қолдауды қамтамасыз етті.

Бұл жетістік біздің студенттердің жоғары дайындық деңгейін және олардың тұрақты ауыл шаруашылығына арналған заманауи цифрлық шешімдерді дамытуға үлес қосуға дайындығын растайды. Жеңімпаздарды құттықтаймыз және шығармашылық жетістіктер тілейміз!