Ауыстыру, қайта қабылдау және оқудан шығару

Жазғы семестр университеттегі оқу процесінің құрамдас бөлігі болып табылады және мынадай мақсаттарда ұйымдастырылады: қосымша оқыту; пән бойынша академиялық қарызды жою; студенттерді бір жоғары оқу орнынан екіншісіне, бір мамандықтан (білім беру бағдарламасынан) екіншісіне ауыстырған кезде, студенттерді қайта қабылдаған кезде оқу жоспарларындағы айырмашылықты жою.

Жазғы семестр бітіруші курсты қоспағанда, білімнің барлық деңгейіндегі білім алушылар үшін ақылы негізде ұйымдастырылады.

Жазғы семестрдің ұзақтығы — кемінде 6 апта; бұл ретте пән толық көлемде оқытылады.

Бір жазғы семестрге 15 кредиттен аспайтын көлемде өтінім беруге болады. Жазғы семестрден (кредиттерден) өту үшін төлем жасағаннан кейін білім алушы жазғы семестр басталғанға дейін ЦОС-та пәндерге жеке тіркеледі.

Курс бағдарламасын толық көлемде орындаған, бірақ ауыстыру балының ең төменгі мәнін жинай алмаған білім алушыға өзінің үлгерімінің орташа балын (GPA) арттыру мақсатында жазғы семестрде жекелеген пәндерді ақылы негізде қайта оқуға және олар бойынша емтихандарды қайта тапсыруға мүмкіндік беріледі.

Жазғы семестрде оқу құқығына білім алушылардың мынадай санаттары ие:

• өткен оқу кезеңі үшін академиялық қарызы барлар, оның ішінде дәлелді себепсіз емтиханға келмегендер;
• қайта қабылдау, ауыстыру, академиялық демалыстан оралу кезінде академиялық айырмашылығы барлар;
• қосымша оқудан өтуді қалаушылар;
• курсқа қайта қабылдануды қалаушылар.

Қосымша оқудан өту үшін жазғы семестрге құқықты академиялық қарызсыз келесі курсқа ауыстырылған білім алушылар иеленеді, бұл ретте білім алушы қосымша оқитын пәндердің саны GPA деңгейіне байланысты айқындалады.

Білім алушыға жазғы семестрде қосымша курстардан өту құқығы мынадай талаптарды ескере отырып беріледі:

• білім алушылар академиялық қарызсыз келесі курсқа ауыстырылуы тиіс;
• қосымша оқу курстарының саны білім алушының жылдық GPA деңгейімен айқындалады, GPA неғұрлым жоғары болса, ол соғұрлым көп қосымша курсқа өтінім бере алады, бірақ белгіленген шкаладан аспайды.

Жазғы семестрде оқу жетістіктерін бақылаудың мынадай түрлері қолданылады: ағымдағы, үлгерімді аралық бақылау, ауызша емтихан нысанындағы аралық аттестаттау.

Жазғы семестрдегі білім алушылардың оқу жетістіктері оқу жетістіктерін бағалаудың балдық-рейтингтік әріптік жүйесі бойынша бағаланады.

Университетке басқа жоғары оқу орнынан немесе білім беру бағдарламасынан ауыстыру немесе қайта қабылдау рәсімі үшін білім алушы ЦОС-қа университеттің бірінші басшысының атына өтініш береді.

Өтінішпен бірге білім алушы мынадай құжаттарды ұсынуға тиіс:

• жеке басын куәландыратын құжаттың көшірмесі;
• оқу үлгерімінің транскрипті;
• білім беру грантын иеленуші куәлігінің көшірмесі;
• ҰБТ сертификатының көшірмесі (шығармашылық ББ-дан ауысқан кезде);
• оқыған жоғары оқу орны лицензияларының көшірмелері;
• бұрын оқыған жоғары оқу орны басшысының атына өтініштің көшірмесі (басшының қолымен және мөрімен);
• формалды және формалды емес білім берудің оқу нәтижелерін тану туралы Бейіндік комиссия отырысының хаттамасы.

Білім алушыны шетелдік білім беру ұйымынан ауыстырған немесе қайта қабылдаған кезде өтінішке мынадай құжаттар қоса беріледі:

• жеке басын куәландыратын құжаттың/паспорттың көшірмесі;
• меңгерілген оқу бағдарламалары туралы құжат (транскрипт);
• оқыған жоғары оқу орны лицензияларының көшірмелері;
• оқу нәтижелерін тану және пәндерді қайта есепке алу, оқу айырмашылығын айқындау туралы Бейіндік комиссия отырысының хаттамасы;
• алдыңғы білім деңгейін аяқтау туралы құжат.

Бұл ретте егер алдыңғы білім шетелдік білім беру ұйымында алынса, Қазақстан Республикасында білім туралы құжаттарды тану және нострификаттау қағидаларында белгіленген тәртіппен нострификаттау рәсімінен өту қажет.

Білім алушының өтініші мен ұсынылған құжаттары негізінде:

• бейіндік комиссия білім беру бағдарламасына сәйкес меңгерілген кредиттерді қайта есепке алуды жүргізеді, транскриптте көрсетілген, білім алушы алдыңғы академиялық кезеңдерде оқыған пәндердің академиялық айырмашылығын айқындайды және меңгерілген пререквизиттерге сәйкес оқу курсын белгілейді;
• факультет деканының, ОӘЖ жөніндегі проректордың бұрыштамаларына сәйкес ЦОС білім алушыны ауыстыру туралы ҚазУТБ ректорының бұйрығын шығарады.

ҚазУТБ ЦОС қызметкері білім алушыны ауыстыру туралы бұйрық негізінде ауыстыру тәртібімен қабылдау туралы бұйрықтан үзінді көшірмені және білім алушы бұрын оқыған жоғары оқу орнына сұрау салуды жібереді.

Білім алушы бұрын оқыған жоғары оқу орны оның жеке ісін жіберу туралы жазбаша сұрау салуды алған күннен бастап үш жұмыс күні ішінде білім алушының жеке ісін ҚазУТБ-ға жібереді.

Білім алушыны білім беру гранты негізінде жоғары оқу орнынан ҚазУТБ-ға ауыстырған кезде ЦОС жоғары оқу орындарын қаржыландыру көлемін түзету үшін ҚР БҒМ ЖжОБ департаментіне және тиісті бюджеттік бағдарламаның әкімшісіне білім алушыны қабылдау туралы бұйрықтан үзінді көшірмені оның атына жазылған білім беру гранты куәлігінің көшірмесімен бірге ұсынады.

Білім алушыларды ақылы негізде оқыту үшін басқа жоғары оқу орнынан ҚазУТБ-ға ауыстыру білім алушы мен ҚазУТБ арасында білім беру қызметтерін көрсету туралы шарт жасасумен қатар жүреді.

1-3 курстарға: білім алушыны ауыстыру/қайта қабылдау тиісті курсқа жүзеге асырылады, бұл ретте оқу жоспарларындағы айырмашылық 25 кредиттен аспауға тиіс, әйтпесе ауыстыру/қайта қабылдау бір курс төмен жүзеге асырылады.

Білім алушыны Университеттен басқа жоғары оқу орнына ауыстыру рәсімі мынадай тәртіппен жүзеге асырылады:

1. ҚазУТБ-дан басқа жоғары оқу орнына ауысуды қалайтын білім алушы университеттің бірінші басшысының атына белгіленген үлгідегі ауыстыру туралы өтініш береді және мөрмен бекітілген ауыстыруға келісім алып, өзін қызықтыратын жоғары оқу орнының басшысына жүгінеді.
2. Қабылдаушы жоғары оқу орны басшысының атына берілетін ауыстыру туралы өтінішке университет ректоры, тіркеуші офисі, ЦОС басшысы қол қойған, мөрмен бекітілген транскрипттің көшірмесі, білім беру грантын иеленуші куәлігінің көшірмесі, университет ректорының атына берілген өтініштің көшірмесі (ректордың қолымен және мөрімен) қоса беріледі.
3. Білім алушы ауысатын жоғары оқу орнының ректоры өтінішті алған күннен бастап үш жұмыс күні ішінде «ҚазУТБ» АҚ-ға оның жеке ісін жіберу туралы жазбаша сұрау салу жібереді.
4. «ҚазУТБ» АҚ ЦОС мұндай сұрау салуды алғаннан кейін «(жоғары оқу орнының атауы) ауысуына байланысты оқудан шығарылды» деген тұжырыммен ректордың оқудан шығару туралы бұйрығын шығарады және оқудан шығару туралы бұйрық шыққан күннен бастап үш жұмыс күні ішінде білім алушының жеке ісін қабылдаушы жоғары оқу орнының мекенжайына жібереді.

Білім алушы оқыған «ҚазУТБ» АҚ-да жеке істе сұрау салудың көшірмесі, сертификаттың, куәліктің (бар болса) көшірмелері, транскрипт, ауысуға байланысты оқудан шығару туралы бұйрықтан үзінді көшірме және айналып өту парағы, алдыңғы білім құжаттарының көшірмелері, жеке басын куәландыратын құжаттың көшірмелері қалады.