ҚазТБУ-нің «TengriCapital» командасы «Қаржы» білім беру бағдарламасы бойынша Республикалық пәндік студенттік олимпиадада II орынды иеленді
2026 жылғы 11 қарашада Q University базасында (Алматы қ.) Қазақстан Республикасының Ұлттық валюта күніне арналған «Қаржы» білім беру бағдарламасы бойынша Республикалық пәндік студенттік олимпиада өтті. Олимпиадаға еліміздің түрлі жоғары оқу орындарынан барлығы 27 команда қатысты.
Қазақ тілінде баяндама жасайтын секцияда Қ. Құлажанов атындағы Қазақ технология және бизнес университетінің намысын «TengriCapital» командасы абыроймен қорғады. Команда құрамы:
* Орынкулов Адильжан Талгатович (команда капитаны);
* Съезбек Айару Айдосқызы;
* Тұрсынова Дария Шалқарқызы.
Команданың ғылыми жетекшісі — Сарсенбаева Кенжегуль Айтхановна.
Олимпиада үш конкурстық турдан тұрды: жасанды интеллект қолданылған «Таныстыру», қаржы және ЖИ саласындағы шағын жобаны қорғау («Үй тапсырмасы») және қаржылық талдау, инвестициялық жобаларды бағалау (NPV, IRR, WACC, CAPEX) мен ақша ағындарын болжау бойынша есептер шешуге арналған «Капитандар сайысы».
Барлық кезеңдердің қорытындысы бойынша «TengriCapital» командасы жоғары қаржылық сауаттылық, жүйелі ойлау және үздік талдамалық құзыреттерін көрсетіп, жүлделі II орынға ие болды.
Студенттер мен ғылыми жетекшісін лайықты жеңістерімен құттықтаймыз және алдағы оқу мен ғылыми қызметтеріне толағай табыстар тілейміз!
